Recèto dóu Saussoun
Qu sian ?
Lou cous de lengo
Lou parla dóu Var
Leis escrivan loucau
Liame - Liens
Aventuro de Pinòquio
Recèto dóu Saussoun
Quicho clau
La recèto dóu Saussoun (versien de Reinat Chauvin)


Dins lou mourtié fau metre la mita d'uno anchoio e uno pougnado d'amendoun pela pèr taulejaire, uno pougnado de fueio de fenoui-fèr, douas vo tres fueio de mento e un pau d'aiet - segound lou goust, mai n'en fau pas tròup !
Trissas tout acò emé d'òli... es lèst.

Es poussible d'emplega d'amendo vièio messo à trempa la vèio dins l'aigo coumo si fa pèr lei faiòu, vo de farino d'amendo (es lou mai eisa, e s'atrovo d'en pertout) mesclado d'aigo pèr la faire espoumpi.

Lou saussoun si tasto coumo acò sus de pichóunei lesco de pan. Es fouarço aprecia pèr acoumpagna un aperitiéu.

D'estiéu, dins la calourasso, es agradiéu de bagna lou saussoun emé d'aigo fresco pèr n'en faire uno soupo claro e la manja sus de lesco de pan. Eici si dis qu'es un plat espargnous, bord qu'au mai li a de taulejaire, au mai si pòu apoundre d'aigo !

Pèr faire aquelo recèto, à la debuto li anarès de-chaspoun ; dins vouàstreis assai, uno recoumandacien : que tóutei lei perfum dei coumpausant si retrovon e que ges d'entre élei prèngue lou pas sus leis autre.

 

oo---oo---oo---oo

 


Lou saussoun de Tanto Terèso (versien d'Enri Rouvier)

Dins un mourtié metre :
- lei fielet de 6 anchoio dessalado
- 4 veno d'aiet
- uno pichouno pougnado de fueio de mento
- autant de flour de fenoui-fèr

Trissa en li apoundènt enviroun 300 gr d'amendo de l'annado.
Bèn mescla lou tout em'un à dous decilitre d'òli d'óulivo jusqu'à óuteni uno poumado óumougèno.
Enfin li versa sus un à dous litre d'aigo bèn fresco pèr li douna la counsistènci d'uno soupo freio.
Metre dins chascuno dei sieto douas bèllei lesco de pan de campagno de la vèio e li fa béure aquéu saussoun.

Si manjo... à l'oumbro.

Es de tradicien de pourgi lou saussoun eis endumiaire à l'óucasien de la souido, qu'acò's lou repas de fin d'endùmi óufert pèr lou prouprietàri de la souco.
Lei quantita dounado va soun à “l'à pau-près”, e pouadon varia segound lou noumbre de taulejaire, l'aspèt e lou goust de la preparacien.
La presènci de flour de fenoui-fèr limito sa counsoumacien ei periodo lei pus caudo : estiéu e autouno. Es un plat que vous refrescara, fouarço perfuma e que si pòu garda quàuquei jour, mai que tant pourrié sousprendre lei palai noun averti.

Bouan apetis !

Bèn-vengudo sus lou site
em' uno bouano visito ! !